Наврўз – қадим қадриятлар таровати

 Янгиланиш, яшариш фасли бошланди. Шукуҳли бу кунларда эса юртимизда Наврўз умумхалқ байрами кенг нишонланади. Бобо деҳқону боғбонлар дала томон ошиқар экан, «Қадаминг қутлуғ келсин, Наврўз», дея ният қилишади. Наврўз — бунёдкорлик, бирдамлик ва ризқ-рўз байрамидир.

 Юртимизда байрам шодиёнаси. Ўлкамизнинг барча жойларида бўлгани каби Оқбулоқ СИУда ҳам туман фермер хўжаликлари ва аҳоли ўртасида Наврўз сайли кўтаринки рухда нишонланди. Дошқозонда ош дамланиб, дастурхонлар миллий таомлар билан безатилди.

 Наврўз сайлини нишонлаш учун туман жамоатчилиги вакиллари, маҳалла фуқаролар йиғинларидан ташриф буюрган меҳмонлар “Оқбулоқ” СИУ дала шийпонига йиғилдилар. Туман ҳокими Х.Алимарданов йиғилганларни уларнинг тимсолида туманимиз аҳлини байрам билан табриклади. 

 Наврўз кунларида фақат яхшиликлар ҳақида гапирилади, Яратгандан қут-барака тилаб, ишга киришилади, бу йил ҳам ўз олдимизда истиқболли режалар белгилаганмиз – деди туман ҳокими Хуршид Алимарданов. 

Яхши йил – кўкламидан маълум, дейди доно халқимиз. Айниқса, бу йилги баҳор файзли бошланди. Табиатдаги ажиб уйғониш, янгиланиш юртдошларимиз руҳиятига ҳам кўчаётир. Қуёш заминни қиздириб, деҳқонларни далаларга ҳар доимгидан эрта чорлади. Кўнглига эл дастурхонини тўкин қилишдек эзгу мақсадни туккан бободеҳқонлар ва миришкорлар аллақачон далага чиқиб, ерга барака уруғини қадай бошлади.

Наврўз – янги режалар, мақсадларнинг қарор топиши. Наврўз шукуҳи доимо дилларда мангу бўлсин!

                                                                                                     Арнасой туман ҳокимлиги

                                                                                                     Ахборот хизмати