АРНАСОЙДА УЧ АВЛОД УЧРАШУВИ
Арнасой туманида Мустақиллигимизнинг 30 йиллик байрами арафасида тумандаги Бобур МФЙ худудидаги "Севимли” боғида “Янги Ўзбекистонда эркин ва фаровон яшайлик!” шиори остида “Уч авлод учрашуви” доирасидаги маънавий-маърифий тадбир бўлиб ўтди.
Тадбирда турли соҳаларда туман равнақига салмоқли ҳисса қўшган кекса авлод вакиллари, фидоий зиёлилар ҳамда фаол ёшлар иштирок этдилар.
Шунингдек вилоятдан келган Жиззах вилоят Маҳалла ва оилани қўллаб қувватлаш бошқармаси бошлиғи Назира Мухтарова, Жиззах вилоят Нуронийлар кенгаши раиси Норқул Нишоновлар ҳам иштирок этди.
Ушбу тадбирни туман ҳокими Хуршид Алимарданов тaбрик сўзи билан очиб, мустақиллигимиз арафасида туманимизнинг ижтимоий-иқтисодий ҳаёти ва бунёдкорлик соҳаларида эришган ютуқлари ҳақида алоҳида тўхталиб ўтди.
Меҳнат фахрийлари Омон Наврўзов, Исоқ Авалбоев, Низом Пардаев, Бошмон Хожиев ҳамда Холтожи Назаровалар Мустақиллигимизнинг 30 йиллиги шодиёнаси билан тадбир иштирокчилари қутлаб, дорилмон кунлар учун шукроналар айтдилар.
Шунингдек, истеъдодли ёш шоир Умид Қодиров ва Наргиза Жуманазаровалар мамлакатимизда ёшларга бўлган эътибор ва ғамхўрлик учун давлатимиз раҳбари, устозлари ва ота-оналарига миннатдорчилик билдирдилар.
Туман ҳокими ташаббуси билан барча иштирокчиларга эсдалик совғалари топширилди. Ташкил этилган байрам дастурхони ва таниқли санъаткорларининг байрамона чиқишлари тадбир иштирокчиларга кўтаринки кайфият бағишлади.
Арнасой туман ҳокимлиги Ахборот хизмати